Во Скопје од 11 до 26 ноември ќе се одржи 27. издание на фестивалот „Есенски музички свечености“, со пет концертни вечери. Програмата почнува на 11 ноември во концертната сала на Факултетот за музичка уметност – Скопје.
Програмата опфаќа настапи на студенти од Факултетот за музичка уметност, камерни состави, дуо и солистички концерти. Настаните ќе се одржат во концертната сала на ФМУ и во Културно-информативниот центар – КИЦ.
Фестивалот ќе биде отворен на 11 ноември во 20 часот со концертот „60 ГОДИНИ ФМУ СКОПЈЕ“, во изведба на студентите при Факултетот за музичка уметност – Скопје. Концертот ќе има повторна изведба на 23 ноември во концертната сала на ФМУ.
На 16 ноември во Салонот 19:19 на КИЦ ќе настапи SOUNDSCAPE TRIO од Србија со камерниот концерт „МЕЃУ НАСМЕВКИТЕ И СОЛЗИТЕ“. Триото го сочинуваат Андрија Минчиќ на кларинет, Тадија Минчиќ на фагот и Никола Цветковиќ на пијано.
На 25 ноември на програмата е концертот „СОНАТНИ ПРИКАЗНИ“ на дуото Зоран Станишиќ на пијано и Стефан Котевски на виолина. Како гости ќе настапат Јосипа Василевска на флејта и Злате Огњановски на фагот.
Последната фестивалска вечер е на 26 ноември, кога во Салонот 19:19 ќе се одржи солистичкиот концерт на Хатиџе Салиева на виолина, со музичката тема „ЧЕТИРИТЕ ГОДИШНИ ВРЕМИЊА“ од Антонио Вивалди.
Фестивалот традиционално го организира Дирекцијата за култура и уметност на Скопје – Скопско лето.
