Нова рунда мировни преговори меѓу Русија, Украина и САД ќе се одржи на 10 и 11 ноември во Абу Даби, потврдија Соединетите Држави. Разговорите доаѓаат по повеќемесечен застој и по претходни најави дека преговорите ќе продолжат во ноември.
Според Ројтерс, датумите ги соопштил специјалниот пратеник на САД, Стив Виткоф. Американската делегација ќе ја предводат Виткоф и Џаред Кушнер, зетот на Доналд Трамп и еден од неговите клучни преговарачи.
Ова е нов обид на администрацијата на Трамп да ги врати трилатералните разговори, по последната ваква средба во февруари. Пред оваа рунда, американските преговарачи треба да имаат и разговори со европски претставници во Брисел, а на дневен ред ќе бидат безбедносните гаранции за Украина, идната безбедносна архитектура на Европа и помошта за повоената обнова на земјата.
Во трилатералните преговори нема да учествуваат европски земји. Кремљ претходно наведе дека нивното вклучување не било договорено.
За нови разговори првпат се зборуваше на 21 октомври, кога Виткоф се сретна со рускиот претседател Владимир Путин во Санкт Петербург. Потоа помошникот на Путин, Јуриј Ушаков, изјави дека Москва е, во принцип, подготвена да ги продолжи разговорите во текот на ноември, а украинскиот претседател Володимир Зеленски подоцна рече дека е постигнат договор за средба во Абу Даби во првата половина од ноември.
Зеленски претходно кажа и дека би сакал, по разговорите меѓу делегациите, да има и средба меѓу шефовите на држави. Украина, пак, инсистира на цврсти безбедносни гаранции и на финансирање на својата војска во период од најмалку десет години, ако се постигне мировен договор.
