Градоначалникот на Скопје, Орце Ѓорѓиевски, најави изградба на две нови училишта во Драчево и Ѓорче Петров, како и целосна реализација на подземната сообраќајница „Македонија“ до крајот на мандатот.
Исправките се вршат преку ребаланс на буџетот, кој според Ѓорѓиевски се прави кога ќе останат средства од заштеди на одредени постапки и проекти. Тие средства се реалоцираат за нови проекти кои, како што нагласи, одговараат на неговите предизборни ветувања.
Ѓорѓиевски потврди дека паралелно ќе почнат со изградба на училиште на местото на ветеринарното училиште и гимназијата во Драчево и училиште во Ѓорче Петров, каде што средношколците наставуваат во бараки.
Во однос на подземната сообраќајница „Македонија“, тој објасни дека за втората фаза биле предвидени 1,1 милијарда денари, но во тендерска постапка цената паднала на 750 милиони денари. Останатите средства се реалоцирани за да започне постапката за нов кружен тек на влезот во Скопје од страната на Сарај и нов мост, проект што бил ветуван триесетина години.
Иако во кампањата Ѓорѓиевски ветил реализација само на првата фаза на „Лимак“, тој изјави дека до крајот на мандатот ќе се реализира во целост.
