Глобалното преминување на сол збогатена со калиум би можело секоја година да спречи 2,96 милиони смртни случаи и 10,17 милиони нови случаи на кардиоваскуларни и хронични бубрежни заболувања, проценуваат истражувачи.
Истражувањето на научници од Институтот „Џорџ“ за глобално здравје во Австралија опфатило 193 земји. Резултатите се пренесени од Еуроњуз.
Солта збогатена со калиум се произведува со замена на дел од натриум хлоридот во обичната кујнска сол со калиум хлорид и може да се најде во некои продавници и на интернет.
Според Светската здравствена организација, околу 1,4 милијарди луѓе во светот, односно приближно еден од тројца возрасни на возраст од 30 до 79 години, имаат хипертензија. Високиот крвен притисок е еден од главните фактори на ризик за мозочен удар, срцев удар и болести на бубрезите.
