Самостојната изложба „Effortless“ на македонската уметница Јана Луловска вечерва се отвора во Македонскиот културно-информативен центар во Белград. Настанот е поддржан од Министерството за култура и туризам и е дел од годишната програма на КИЦ Белград.
Изложбата ќе биде отворена во 19:30 часот на адреса Македонска 30, а ќе ја отвори директорот на КИЦ Белград, Васко Шутаров.
„Effortless“ е инспирирана од движењето Флуксус и се фокусира на играта, флуидноста и експериментирањето, при што процесот на создавање е ставен пред завршеното дело. Во серијата, Луловска работи спонтано со дигитални алатки и гради визуелни простори во кои движењето и промената се централни елементи.
Делата ги спојуваат линиите, гестуалните потези и органските и геометриските форми на бледосиви позадини, а дел од композициите продолжуваат и на ѕидот преку интервенција на самата уметница.
Луловска е наградувана уметница чиј опус опфаќа фотографија, сликарство, графика, инсталација и експериментален филм. Нејзини дела се застапени во меѓународни колекции, а филмовите ѝ се наградувани на меѓународни фестивали.
Изложбата ќе може да се погледа до крајот на месецов.
