Претседателот на Владата, Христијан Мицкоски, со владина делегација оствари работна средба во Бон со раководството на Дојче Телеком. Според компанијата, ова е прва официјална посета на македонската влада на Дојче Телеком.
На средбата со Тимотеус Хетгес, главен извршен директор на Дојче Телеком, и Доминик Лерој, член на Управниот одбор на компанијата и одговорен за Европа, биле разгледани соработката меѓу двата најголеми акционери во Македонски Телеком, како и можностите за понатамошна дигитална трансформација.
Од Дојче Телеком соопштија дека на разговорите се отвориле теми поврзани со европската конкурентност, безбедноста и дигиталниот суверенитет, а компанијата ги претставила своите капацитети во областа на cloud технологиите, вештачката интелигенција, индустриската вештачка интелигенција и сајбер-безбедноста.
Хетгес изјави дека Дојче Телеком повеќе од две децении е присутен на македонскиот пазар и дека заедно со Владата е подготвен да придонесе Македонија да биде дигитално конкурентна. Компанијата наведе и дека преку Македонски Телеком е присутна во земјата повеќе од 25 години, со инвестиции од над 1,19 милијарди евра во инфраструктура и најнови технологии.
Во соопштението се посочува и дека лани бил потпишан меморандум за разбирање меѓу Владата и компанијата, со цел конкретни активности за дигитална трансформација и просперитет на земјата.
