Мицкоски: Граѓаните да очекуваат нови провокации од ДУИ, секогаш кога се фатени во кражба се вртат кон национализам и шовинизам

Претседателот на ВМРО-ДПМНЕ, Христијан Мицкоски, денеска од Радовиш ги повика македонските граѓани да не наседнуваат на националистичките провокации од лидерот на ДУИ, Али Ахмети, којшто викендов во селото Сопот во Општина Липково отвори Меморијален центар или Музеј на УЧК, а во којшто ја има картата на Голема Албанија, негови слики и на команданти во униформа и ознаки на УЧК.

„Треба во периодот што следи граѓаните да бидат внимателни, бидејќи секогаш ДУИ кога се фатени во лоповлук, во кражба, во пљачка, тие веднаш вртат на националните теми, односно на национализам и шовинизам. ДУИ е веќе во кампања, периодов што следи вакви провокации ќе има. Колку се тие провокции националистички поголеми, бидете свесни дека повторно некој тендер се решава во четири очи и повторно се пљачкаат македонските граѓани“, вели Мицкоски.

Прочитајте и:  Филипче: Не можам да објаснувам потекло на пари за нешто што немам, немам ниту хациенда, ниту луксузно возило

Тој потсети на ветувањата на лидерот на ДУИ, Ахмети, за израдба на фабриката за електрични автомобили во Тетово.

„Покрај дупката и сега поголемата трева, буквално ништо не се случува. Албанците секојдневно ја напуштаат Македонија поради лошите политики на Владата на ДУИ и на СДСМ. Тоа што СДСМ избрале да бидат измеќари, тоа народот ќе си го каже за неколку месеци од денеска. Но ги предупредувам граѓаните да не наседнуваат на овие националистички провокации на Али Ахмети“, рече Мицкоски.

Порача да се сочува разумот, бидејќи, како што рече, за неколку месеци доаѓа силна Влада на ВМРО ДПМНЕ, а актуелните политичари ќе мора да сносат и одговорност.

- Реклама -