Според премиерот Зоран Заев, сите информации укажуваат на тоа дека во Бугарија, заедно со претседателските, во ноември ќе има и нови трети парламентарни избори. Заев вели дека се надева дека по нивното завршување ќе биде формирана нова бугарска Влада, со која ќе може, како што рече, да се разговара за да се најде решение и да се одблокира процесот на почеток на преговори на Северна Македонија за членство во ЕУ.
„Имајќи го тоа предвид, јас очекувам дека крајот на ноември, целиот декември можеме да ги заокружиме прашањата заради тоа што ние ги имаме адресирано сите прашања. Како што реков, преку патоказот ги имаме сите адресирани коишто значат гаранции преку рокови и надлежни институции за зголемување на ефикасноста на реализацијата на Договорот за пријателство, добрососедство и соработка со Бугарија“, рече Заев, одговарајќи на новинарско прашање по одбележувањето на реконструкцијата на Бит-пазар.
Истовремено сме подготвени, додаде Заев апелирајќи тоа да стигне и до Бугарија, да ги номинираме двете ноти дипломатски.
„А тоа е: првата нота дека Северна Македонија е исто како Република Северна Македонија, се однесува на територијална суверена целина на државата Република Северна Македонија, дека немаме територијални претензии према ниту една од соседните држави, вклучително и Бугарија и слично, и да ги испратиме секаде каде што тоа е потребно, вклучително ЕУ, до Бугарија, до соседите, до ОН. Нема проблем со оваа работа.
Второ е прашањето на дипломатската нота за немешање во внатрешните работи, вклучително и малцинските права. Како што реков, во современа Европа, ние се сметаме за исти такви, Бугарија е членка на ЕУ, се решаваат пред судот во Стразбур и нема што ние да се мешаме или тие да се мешаат кај нас за одредени вакви прашања или слично. Наша цел е да водиме грижа овде како што водиме за сите етнички заедници, за сите малцинства коишто ги имаме во државата, вклучително и бугарското малцинство. Тоа го правиме и дефинитивно многу работи се унапредени“, подвлече Заев.
Тој изрази и уверување дека со значително нормализирање на животот по надминување на проблемите со пандемијата, ќе можат да се интензивираат и инфраструктурните капитални инвестиции. Сето тоа навистина создава попозитивен амбиент, пред сѐ кај нас, но исто така еднакво и кај Бугарија, за да можеме да продолжиме на нашиот пат кон Европската Унија, додаде премиерот.
