Светската здравствена организација повика владите да воведат шест мерки за намалување на здравствените последици од климатските промени, за кои проценува дека би можеле да спречат околу 1,6 милиони смртни случаи годишно.
Во извештај објавен на 4 ноември, СЗО наведува дека околу 3,6 милијарди луѓе живеат во подрачја особено изложени на климатските промени и на нивното влијание врз здравјето. Според организацијата, примената на предложените мерки би можела да спречи приближно еден од секои 40 смртни случаи во светот и да донесе економски придобивки вредни трилиони долари.
Генералниот директор на СЗО, Тедрос Аданом Гебрејесус, изјави дека климатската криза е и здравствена криза, но дека голем дел од штетите може да се спречат со веќе достапни алатки. Тој порача здравствената заштита да биде во средиштето на активностите против климатските промени.
Шесте предложени мерки опфаќаат системи за рано предупредување при опасно високи температури, сигурно снабдување со чиста вода за пиење и во услови на екстремни временски настани, како и подобрување на санитарните и хигиенските услови, вклучително и можностите за миење раце.
СЗО предлага и поширока употреба на почисти горива и технологии за готвење и греење во домаќинствата, со цел да се намалат загадувањето на воздухот во затворени простории и емисиите на стакленички гасови. Последната мерка се однесува на промени во начинот на одредување на цените на фосилните горива, за подобро да се одразат штетите врз здравјето, климата и животната средина.
Без дополнителни мерки, неухранетоста, маларијата, дијареата и здравствените проблеми поврзани со високите температури би можеле да предизвикаат околу 250.000 предвремени смртни случаи годишно меѓу 2030 и 2050 година, според проценките на СЗО. Организацијата предупредува и дека до 2050 година климатските промени би можеле да изложат дополнителни 500 милиони луѓе на носители на заразни болести чие ширење зависи од климатските услови.
