Првиот заменик-претседател на Владата и министер за европски прашања Беким Сали во Берлин се сретнал со пратеникот во германскиот Бундестаг, Петер Бајер. На средбата биле разгледани европската перспектива на Северна Македонија, проширувањето на ЕУ и можностите за продлабочување на билатералната соработка.
Во фокусот на разговорите била постепената интеграција на Северна Македонија во единствениот европски пазар, која би требало да донесе конкретни придобивки за граѓаните и компаниите уште пред полноправното членство во Европската Унија.
Сали го нагласил значењето на пристапот на Европската комисија за подготовка на поширока Унија и потребата процесот на проширување да биде подинамичен, попредвидлив и заснован на заслуги.
Како пример за постепена интеграција било посочено вклучувањето на Северна Македонија во Единствената област за плаќања во евра – СЕПА, со кое се намалиле трошоците за прекугранични трансакции и се очекуваат заштеди од над пет милиони евра.
На средбата се разговарало и за преговорите за роаминг со ЕУ, регионалната поврзаност, протокот на стоки и предизвиците за македонските превозници поврзани со правилата за престој во Шенген-зоната.
Теми биле и спроведувањето на Реформската агенда во рамки на Планот за раст за Западен Балкан, владеењето на правото, јавната администрација, дигиталната трансформација и економската конкурентност. Сали ја потврдил посветеноста на Северна Македонија на реформите и на кредибилен и објективно заснован процес на пристапување во ЕУ.
