Русија нема ништо против Преспанскиот договор или било кое ново име на Македонија, но има против членството на Македонија во НАТО, изјавил рускиот амбасадор во Грција – Андреј Маслов, на брифингот во средата во Атина по повод посетата на грчкиот премиер Ципрас на Москва.
Прашан дали Русија ќе стави вето на Преспанскиот договор/новото име на Македонија во Советот за безбедност на Обединетите нации, Маслов вели дека Москва ќе го признае секое прифатено решение за името меѓу Скопје и Атина:
„За нас не прави разлика. Министерот за надворешни – Сергеј Лавров, беше јасен околу ова прашање уште пред речиси една година. Тој рече дека кое и да е името за кое ќе се сложат Атина и Скопје, ако е официјално прифатено и имплементирано и заштитено во Уставот на Република Македонија, тогаш ние секако ќе го признаеме“.
Сепак, истакнал Маслов, Русија останува против членството на Македонија во НАТО, а ако тоа се случи, земјата ќе биде приморана да преземе контрамерки. Маслов не прецизирал какви би биле тие евентуални контрамерки.
Маслов оценил и дека Преспанскиот договор нема да влије на односите меѓу Русија и Грција, кои, според него, полека се нормализираат по дипломатските инциденти од летото, пишува „Катимерини“.
Извор: МКД.мк
