Изјавата на премиерот Зоран Заев – дека ако Бугарија остане на своите барања граѓаните треба да се подготвени дека можеби и нема да започне првата меѓувладина конференција со ЕУ, е многу песимистичка изјава за сите граѓани на земјата, смета пратеникот Скендер Реџепи од коалицијата на Алијанса за Албанците и Алтернатива. Според албанскиот опозициски блок, владата е одговорна за „потфрлување во надворешната политика“, пренесува „Алсат“.
„Тоа е многу песимистичка изјава за сите граѓани на земјата, особено со оглед на фактот дека ние како Албанци во текот на 3 децении жртвувавме многу национални интереси за целите на евро-атлантските интеграции. Сметаме дека сега е време другите да се жртвуваат“, вели Реџепи.
Според него, претходно имало подготвеност од двете страни за компромис, „но конецот некаде бил изгубен“.
„Владата мора да преземе одговорност и да остави простор за оние што можат да најдат компромис, бидејќи интеграцијата во ЕУ за нас како граѓани и Албанци е бескомпромисна“, порачува Реџепи.
