„Бугарија отсекогаш била отворена за дијалог со Република Северна Македонија и очекувам овој дијалог да придонесе кон нашето културно зближување, но и да ја поттикне економската соработка. Очекуваме Северна Македонија да ги исполни сите свои обврски и кон нас и кон Европската Унија“, изјави денеска претседателот на Бугарија Румен Радев пред средбата со македонската претседателка Гордана Сиљановска Давкова, која е во посета на Бугарија.
Според Радев, Владата на земјава сè уште не ја напуштила изборната реторика.
-Владата на Република Северна Македонија сè уште не ја напуштила изборната реторика. Потребно е да се вратиме во реалноста, Нашите односи ќе зависат од склучените договори, изјави Радев.
Според него, ангажманот на македонската влада во врска со Коридорот 8 ќе биде јасен индикатор за вистинските европски амбиции на земјава и за поголема поврзаност во регионот.
„Очекувам дека изразената желба за дијалог и разбирање од страна на претседателката Сиљановска Давкова ќе остане како доследна политика на владата на Северна Македонија. Ние строго ќе го следиме протоколот. Време е и за мојата официјална посета на Република Северна Македонија“, посочи Радев.
На прашање дали веќе има таква покана, Радев одговори дека за тоа прашање ќе се разговара на средбата.
