Полската полиција соопшти дека распоредува засилени сили во областите долж границата со Русија по предупредување за можни акти на саботажа. Шефот на полицијата Марек Бороњ наведе и сценарио со можен обид на вооружена група да ја премине границата.
Бороњ изјави за радиото RMF FM дека властите минатата недела добиле предупредување од военото разузнавање и од службите на сојузниците. Според него, засега не се објавени детали за содржината на предупредувањето.
Оперативен команден центар е формиран во седиштето на полската полиција во Варшава, а акцијата се спроведува во Варминско-мазурското војводство, во северна Полска долж границата со Калининградската област, како и во Подлашко војводство на североисток, кое граничи со Литванија и Белорусија.
Во операцијата се вклучени полицајци од различни региони, како и антитерористички единици, војската, граничната стража и разузнавачките служби. Бороњ рече дека полицијата ја обезбедува областа поради можни настани што би можеле да доведат до саботажа и дека мора да ги заштити жителите и објектите што би можеле да бидат изложени на ризик.
Покрај тоа, полската полиција им нареди на специјализираните единици да останат во своите бази од 2 до 8 ноември и да бидат подготвени за итно распоредување. Според соопштението, тоа се сили од централната резерва на главниот полициски командант, но самата наредба не значи дека тие веќе се испратени на границата.
Од полицијата наведоа дека се во состојба на зголемена готовност поради закани од саботажи.
