Израелскиот премиер во заминување Бенјамин Нетанјаху повика на широка владина коалиција без арапските партии и со него на чело. Неговата партија Ликуд освои 27 од 120 места на изборите, но ниту неговиот блок ниту опозицијата немаат мнозинство во Кнесетот.
Нетанјаху во изјава објавена на Telegram каналот на Ликуд рече дека е подготвен за „широка влада“ со партнери и со сите што, како што наведе, не го поддржуваат тероризмот. Тој додаде дека е отворен за дијалог околу ова прашање.
Во истата изјава, Нетанјаху рече дека израелската јавност не сака влада што зависи од Ра’ам и Заедничката листа, две арапски партии што постигнаа рекордни резултати на изборите. Тој ги обвини за „поддршка на тероризмот и негирање на постоењето на еврејската држава“.
Ликуд освои 27 од 120 места на парламентарните избори минатиот вторник, а кандидатот на опозицијата Гади Ајзенкот, со новооснованата центристичка партија Јашар, освои 21 мандат. Сепак, ниту еден блок не обезбеди 61 пратеник, колку што е потребно за просто мнозинство.
Израелскиот претседател Исак Херцог планира да почне консултации за формирање нова влада в среда.
