Не треба да има загриженост дека постои некаков документ во којшто се прифатени барања само на една страна, истакна премиерот Ковачевски за емисијата „Само интервју“ на ТВ „Канал 5“, прашан колку сме блиску до изнаоѓање на заедничко прифатливо решение со Бугарија, а во контекст на заложбите на францускиот претседател Емануел Макрон за време на француското претседавање да се направи исчекор во однос на проширувањето на ЕУ.
„Се спомнува и преговарачката рамка, но преговарачката рамка е мултилатерален документ којшто го одобруваат сите земји членки на ЕУ и кој што на крај и ние треба да го одобриме. Тоа е документ во однос на кој најголемиот дел од европските држави не дозволуваат билатерализација на рамката со оглед на тоа што рамката претставува преговори со ЕУ и усогласување, односно пат на кој една држава се интегрира во ЕУ“, рече Ковачевски.
Што се однесува до изјавите на Макрон и на претседателот на Европскиот совет – Шарл Мишел, за создавање Европска политичка заедница во кој би влегле сите европски држави кои не се членки на ЕУ, Ковачевски оценува дека овој предлог повеќе би се однесувал на држави кои треба да ги исполнат критериумите во однос на отпочнување на процесот за интеграција во ЕУ, како Украина, Молдавија, Грузија.
„Ние практично имаме процес кој е дефиниран токму на предлог на претседателот Макрон за пристапување кон ЕУ, преку кластеризација на поглавјата. Само за илустрација, ние имаме веќе усогласено 45% од нашето законодавство со ЕУ. Доколку ја погледнете споредбата на нашата усогласеност и хармонизираност со европската легислатива визави држави од соседството кои преговараат и по 10 години, ние имаме поголема усогласеност со европската легислатива. Ги имаме исполнето сите услови во однос на отпочнување на преговорите, по прашање на усогласеноста и поставеноста на институциите, за позитивните извештаи. Од наша страна сѐ имаме направено“, посочи Ковачевски.
Тој потсети дека македонските позиции се договорени во декларацијата што ја изгласа Собранието и која ја поддржаа сите политички партии. Тоа се позициите до кои и Владата се придржува во разговорите со Република Бугарија, рече премиерот.
„Заедничките решенија, како што реков во неколку наврати, треба да бидат базирани на европски вредности, на задржување на достоинството на граѓаните на двете држави. Бидејќи само така ќе имаме основа за градење добри меѓусоседски односи и брзо интегрирање во ЕУ“, додаде тој.
Извор: МИА
