Повеќе од 50 милиони Американци веќе го дале својот глас на предвременото гласање за меѓуизборите во САД, покажува анализа на Универзитетот на Флорида. Според податоците, најголем дел од гласовите се дадени лично, а околу 23 милиони по пошта.
До неделата наутро, од околу 210 милиони регистрирани гласачи, предвреме гласале 53,14 милиони, наведува анализата. Од нив, 29 милиони гласале лично, а 23 милиони по пошта.
Во споредба со меѓуизборите во 2022 година, кога предвреме гласале 46 милиони луѓе, годинава интересот е поголем. Анализата покажува и дека повеќе од 11 милиони регистрирани демократи веќе гласале, наспроти околу осум милиони републиканци.
Предвременото гласање особено се зголемило во неколку држави. Во Тексас, повеќе од седум милиони луѓе веќе го дале својот глас, што е за над 1,5 милиони повеќе отколку на меѓуизборите во 2022 година. Во Јужна Каролина, предвременото гласање е зголемено за 83 отсто споредено со истиот период во 2022 година, а во Канзас за 34 отсто. Во Мејн е забележан раст од 44 отсто, а во Мичиген приближно 409.000 предвремени гласови повеќе, што е зголемување од 32 отсто.
Повеќето американски сојузни држави овозможуваат лично предвремено гласање, а сите дозволуваат гласање по пошта. Според Центарот за демократија и граѓанско учество при Универзитетот на Мериленд, дел од гласачите се одлучуваат за овој модел поради практичност, кампањи за мобилизација или желба побрзо да ја завршат обврската, а дел и поради општествени и културни причини.
Гласањето по пошта, кое Доналд Трамп постојано го доведува во прашање, останува важен дел од изборниот процес. Во осум сојузни држави и во Вашингтон изборите целосно се спроведуваат по пошта, додека во други држави ливчињата се испраќаат само на гласачи што ќе ги побараат.
