Министерството за надворешни работи соопшти дека преку својата Амбасада во Софија упатило вербална нота со која изразува крајно незадоволство од неодамнешните јавни изјави на членот на Европскиот парламент и ко-претседател на политичката партија ВМРО – Бугарско национално движење (ВМРО-БНД), Ангел Џамбаски.
„Џамбаски во повеќе наврати изразува иредентистички и територијални претензии кон Република Северна Македонија и упатува тешки навреди кон угледот на високи државни претставници на Република Северна Македонија. Упатувајќи закани и тешки навреди, повредувајќи го достоинството на Република Северна Македонија и нејзините граѓани, г-нот Џамбаски се однесува спротивно на заложбите и стремежите изразени во Договорот за пријателство, добрососедство и соработка меѓу двете земји“, се вели во соопштението на МНР за јавноста.
Од МНР додаваат дека, соодветно на Договорот за пријателство, очекуваат по ова известување државното раководство, Владата и МНР на Бугарија да го осудат и да се оградат од изјавите на Џамбаски.
„Истовремено, Министерството за надворешни работи би ги ценело евентуалните активности преземени од надлежните институции на Бугарија за преземање мерки за превенција на вакви и слични однесувања“, се додава во соопштението.
