Косовскиот премиер изјави дека балканскиот регион ужива најголем степен на мир, слобода и демократија во изминатите 25 години, но дека тоа би можело да се смени ако Русија победи во Украина и ја охрабри српската експанзија.
Според него, важно е Западот да застане обединет во поддршка на Украина додека таа се брани од руската агресија.
Вашингтон пост објави на својата веб-страница делови од негово интервју за Асошиејтед прес, во кое Курти тврди дека силна Русија ќе ја охрабри Србија – и дека не само Косово, туку и Босна, Црна Гора и „можеби Северна Македонија“ ќе бидат загрозени од, како што нагласи, српските експанзионистички амбиции.
Односите меѓу Косово и Србија остануваат напнати, а 13-годишните разговори за нормализација што ги олеснува Европската унија не постигнаа напредок, особено по престрелката во септември минатата година меѓу маскирани српски вооружени лица и косовската полиција, во која загинаа четири лица.
„Овие 25 години во овој век се со највисок степен на мир, слобода и демократија на Балканот“, рече Курти.
Тој зборуваше во дипломатската мисија на Косово во Варшава, полскиот главен град. Мисијата беше отворена откако Полска и Косово воспоставија конзуларни односи во 2022 година.
На прашањето што би значело за Косово и за Балканот пошироко доколку Русија победи во Украина, Курти рече „со оглед на тоа што Србија е регионален хегемон и руски застапник, овие 25 години мир, слобода и демократија на Балканот, без преседан во нашата историја, повторно се изложени на ризик“.
