Премиерот на Косово, Албин Курти ја оцени американската одлука да го прекине учеството на Косово на воената вежба во Европа под американско раководство како неправедна и катастрофа.
Американскиот амбасадор во Косово, Џефри Ховениер, ден претходно соопшти дека Владата на Косово не ги координирала со САД акциите преземени на северот во државата и затоа ги претрпе првите последици, откажување на учеството на вежбите „Бранител Европа 2023“.
„Она што го видовме е прекин на вежбата ‘Бранител Европа 23’, за која се подготвувавме две години. Тоа е катастрофа. Мислам дека не е фер, но кој сум јас да одлучам? Повторно дозволете ми да нагласам дека САД се незаменлив пријател, партнер и сојузник за нашата безбедност и одбрана, за нашата демократија и развој“, истакна Курти одговарајќи на прашањето на Радио Слободна Европа (РСЕ) дали американските мерки се удар за Косово.
Курти во Братислава денеска се сретна со високиот претставник на Европската Унија за заедничка надворешна политика и безбедност – Жозеп Борел, и специјалниот претставник на ЕУ за дијалог – Мирослав Лајчак.
На прашањето на РСЕ како поминала средбата со европските претставници, косовскиот премиер истакна дека „средбата била важна“.
„Мора да има имплементација (на договорот Косово-Србија) на вистинскиот пат и мислам дека некогаш сме стагнирале, а понекогаш скршнуваме од патот. Затоа ми беше многу важно да дојдам во Братислава на оваа средба и да ги информирам Борел и Лајчак, бидејќи треба да биде јасно за неодамнешните настани во Косово предизвикани од Србија“, посочи Курти.
Од друга страна, нагласи тој, „потребно е што поскоро да се спроведе договорот“.
„Да не заборавиме, имаме договор, немаме избор. Сепак, немаме решение, не затоа што немаме договор, туку затоа што немаме имплементација на договорот. Се обидов да ги убедам Борел и Лајчак да се фокусираат 100 отсто во однос на време и енергија на редоследот за спроведување на договорот меѓу Косово и Србија“, истакна Курти, алудирајќи на патоказот што тој и српскиот претседател Александар Вучиќ го договорија на средбата во Охрид на 18 март.
Во меѓувреме, РСЕ јави дека Мирослав Лајчак ќе отпатува во Кишињев, главниот град на Молдавија, каде ќе разговара со претседателот на Србија – Александар Вучиќ, јдознава Радио Слободна Европа без засега да добие потрврда од Кабинетот на српскиот претседател.
Утре во Кишињев ќе се одржи вториот самит на европската политичка заедница на кој ќе учествува и Вучиќ, а Лајчак ќе оди во Молдавија само за да разговара со претседателот на Србија за случувањата на северот на Косово. По Молдавија, Лајчак ќе биде Белград и Приштина, според РСЕ.
Првиот самит на европската политичка заедница се одржа во октомври 2022 година во Прага, на иницијатива на францускиот претседател Емануел Макрон.
МИА
