Сите четири украински региони неодамна анектирани се под заштита на рускиот нуклеарен арсенал, потврди денеска Кремљ.
„Сите тие територии се неотуѓиви делови на Руската Федерација и сите се заштитени. Нивната безбедност е загарантирана во иста мера како и остатокот од руската територија“, одговори портпаролот Дмитриј Песков, на новинарско прашање дали тие региони се под руски нуклеарен чадор.
Претходниот месец, рускиот претседател Владимир Путин изјави дека Москва е подготвена, доколку е потребно, да го искористи нуклеарниот арсенал за одбрана на „територијалниот интегритет“ на Русија и дека анектираните украински подрачја ќе бидат дел од Русија „засекогаш“. Сепак, Русија нема целосна контрола врз тие подрачја и допрва треба да се дефинираат нивните граници.
Претседателот на САД – Џо Бајден, пак, неодамна изјави дека не е можно Русија да употреби нуклеарно оружје а тоа да не резултира со Армагедон.
