Претходните истражувања покажаа дека за мажите со зголемена простата или други проблеми со мокрењето можеби е подобро да седат.
Во споредба со стоењето, седењето би можело да помогне во опуштањето на мускулите на карличното дно и поцелосното празнење на мочниот меур, вели Саенс алерт.
Но некои истражувања укажуваат на спротивното. Кај мажите на возраст до 50 години, мокрењето во седечка положба може да биде поврзано со поголема веројатност за истекување неколку капки урина по завршувањето на мокрењето.
Сега научниците решија да ја проверат оваа дилема со рандомизирано вкрстено истражување.
Истражувањето го спроведоа научници од Колумбиската група за уролошки истражувања, а резултатите се објавени во научното списание Неуролоџи енд уродинамикс.
Во истражувањето учествуваа 52 здрави мажи на возраст од 18 до 39 години, кај кои научниците го следеле мокрењето и во седечка и во стоечка положба.
Околу половина од учесниците биле случајно избрани прво да мократ седејќи, а потоа стоејќи, додека другата половина го правела тоа по обратен редослед.
Меѓу двете мерења имало пауза од најмалку 24 часа, за резултатите од првото мерење да не влијаат врз второто.
При секое мокрење научниците ја мереле максималната брзина на протокот на урината, односно колку брзо истекува урината во моментот кога млазот е најсилен, како и вкупното количество исфрлена урина.
Се покажало дека положбата речиси и не влијае врз резултатите.
„Кај здравите мажи положбата при мокрењето не влијаеше значително врз максималната брзина на протокот на урината ниту врз количеството исфрлена урина“, заклучија истражувачите.
Единствената разлика била тоа што на здравите мажи им требало малку повеќе време да го достигнат најсилниот млаз кога мокреле стоејќи.
Разликата била статистички значајна, но делумно зависела од резултатот на еден учесник што значително отстапувал од останатите. Затоа научниците сметаат дека таа веројатно нема вистинско медицинско значење.
На крајот, резултатите покажуваат дека за здравите мажи практично нема разлика дали мократ седејќи или стоејќи.
За некои ова можеби ќе биде олеснување.
Едно глобално истражување од 2023 година, во кое учествуваа повеќе од 7.000 мажи, покажа дека во САД околу 10 отсто од мажите мократ седејќи, додека во други земји тој процент е многу поголем.
Во Германија, на пример, 40 отсто од мажите рекле дека мократ седејќи, иако германскиот збор за маж што мокри седејќи понекогаш се користи и како навреда.
Во некои култури одлуката дали мажот ќе мокри седејќи или стоејќи е проследена со предрасуди. Но според досегашните научни сознанија, таа одлука нема особено значење за здравите мажи, освен кога станува збор за хигиената.
„Без оглед на положбата, се чини дека нема разлика во времето потребно за мокрење, брзината на протокот и степенот на празнење на мочниот меур“, напишаа истражувачите на физиологијата на мочниот меур Кристијан Моро и Шарлот Фелпс за Конверзејшн во 2023 година.
„Доколку немаат проблеми со мокрењето, мажите можат слободно да ја изберат положбата што им одговара. Ако одлучат да стојат, само треба добро да нишанат.“
Но кај мажите што имаат проблеми со мокрењето, најдобрата положба можеби е поинаква.
Едно истражување од 2020 година, спроведено меѓу речиси 200 мажи, покажа дека оние што претпочитаат да мократ седејќи почесто пријавуваат симптоми на проблеми со уринарниот тракт.
Тоа, сепак, не значи дека седењето ги предизвикува проблемите. Можно е овие мажи да решаваат да седат токму затоа што веќе имаат тешкотии со мокрењето.
Но дали седењето навистина им помага?
По 50-годишна возраст кај многу мажи доаѓа до зголемување на простатата, што може да ја притисне мочната цевка и да го отежни мокрењето.
Урологот Рена Малик објасни на Јутјуб дека поради тоа некои мажи мора да се напрегаат при мокрењето или имаат послаб млаз.
Тоа може да го отежни мокрењето во стоечка положба и контролирањето на млазот.
„Затоа седењето може да биде попрактично од хигиенски причини“, објасни Малик.
Но таа призна дека засега станува збор само за претпоставки.
Научните резултати сè уште не даваат конечен одговор за мажите со уринарни проблеми.
Во 2014 година, анализа на 11 истражувања покажа дека мокрењето во седечка положба е поврзано со поцелосно празнење на мочниот меур, но само кај мажите што имаат симптоми на проблеми со долниот уринарен тракт.
Кај здравите мажи не беа забележани разлики поврзани со положбата.
Сепак, истражувањата опфатени со таа анализа главно имаа мал број учесници, а редоследот на мокрење во седечка и стоечка положба не беше случајно одреден.
„И што е особено важно“, додаваат авторите на најновото истражување, „студиите што пријавуваат дека нема разлики ретко спроведуваат формални анализи за еквивалентност, поради што нивните заклучоци понекогаш одат подалеку од она што податоците навистина го потврдуваат“.
Новото истражување отстранува дел од овие недостатоци.
„Од клиничка гледна точка, положбата при мокрењето има мало практично влијание врз мерењето на протокот на урината кај здравите мажи“, заклучуваат авторите.
Затоа, додаваат научниците, здравите мажи можат да мократ во положбата што најмногу им одговара.
Со други зборови, сами нека си решат.
Извор: МКД.мк
