Претседателот Џо Бајден и претседателот Володимир Зеленски утре ќе потпишат билатерален безбедносен договор меѓу Соединетите држави и Украина на маргините на самитот на Г7 во Италија.
Советникот за национална безбедност на Бајден, Џејк Саливан, го објави договорот на новинарите денеска за време на летот за Италија, кој е домаќин на дводневниот самит на лидерите на Групата седум (Г7) во јужниот град Бари.
Петнаесет земји веќе склучија слични долгорочни безбедносни договори со Украина, вклучувајќи ги Велика Британија, Франција и Германија.
Саливан рече дека преговорите на администрацијата на Бајден со Киев сега се финализирани. Тој не даде никакви конкретни детали за содржината на договорот, кој го опиша како „рамка“ за тоа како двете земји работат заедно на решавање на безбедносните прашања.
Сепак, тој нагласи дека пактот нема да ја вклучи обврската Вашингтон да распореди американски војници во Украина, ниту пак ќе содржи обврски за снабдување специфични системи за оружје.
-Нашата цел овде е јасна. Сакаме да покажеме дека САД го поддржуваат народот на Украина, дека стоиме со нив и дека ќе продолжи да помага во решавањето на нивните безбедносни потреби, не само утре, туку и во иднина, рече Саливан.
Тој посочи и дека во договорот ќе биде наведено дека Белата куќа ќе соработува со Конгресот за да најде начин да обезбеди „одржлива“ поддршка за Украина.
Советникот на Бајден рече дека безбедносните договори што ги преговара Киев служат како „мост“ до „крајното членство на Украина во НАТО“.
