„Зоран Заев ништо не разбрал. Зоран Заев само ја повторува истата прес конференција од лани кога исто така лажеше дека ја разбрал пораката, а продолжи да се однесува арогантно и криминално. Jа повтори и прес конференцијата од годината претходно кога истото го велеше, и повторно разочара. Зоран Заев доби и метла со која ништо не измете“, коментира лидерот на ВМРО-ДПМНЕ – Христијан Мицкоски, во реакција на денешната прес-конференција на лидерот на СДСМ.
„Ќе потсетам дека на овие избори арогантно ни велеа дека се најдобри, a прашањето е кога лажеа, кога го тврдеа тоа цела кампања, или сега кога по трет пат викаат дека ја разбрале пораката?“, прашува Мицкоски.
Според него, Заев, на прес-конференциите по поразот во првиот круг од локалните избори, не кажал ништо ново освен тоа што повторно зборувал за минатото, „за некаков режим“ и за истите флоскули во кои, како што вели Мицкоски, никој не му верува. „Сака да заборавите дека 5 години е на власт и пробува повторно да го потцени народот“, додава тој.
Според Мицкоски, владеењето на Заев е режим.
„Кога зборува Заев за режим нека си погледне во сопствениот дом, во Куманово, притисоците за гласање во Прилеп, Велес, Сарај, Битола, за односот кон луѓето и нивните гласови како да се негова сопственост“, вели лидерот на најголемата опозициска партија.
Тој му порача на лидерот на СДСМ и актуелен премиер дека народот е обединет против него:
„Заев, ќе ти кажам дека народот, ние самите сме господари над сопствените судбини и дека никој ја нема нашата волја во џеб за да си поигрува со нејзе. Народот е веќе обединет, но против тебе и сѐ она што ти преставуваш во политиката. Надежта е родена, и таа ќе победи!“, порача Мицкоски.
Тој искоментира и околу потенцијално новата локална власт во Скопје, доколку кандидатката поддржана од ВМРО-ДПМНЕ – Данела Арсовска, победи во вториот изборен круг.
„Бидејќи гледам дека Заев има некои дилеми, да одговорам; Скопје ќе работи многу подобро без централната власт на Заев затоа што ќе биде ослободено од притисоци за тендери и кражби на парите од граѓаните кои по смената ќе завршуваат за проекти и ќе бидат одлично менаџирани од Градот Скопје и новите градоначалници. А по смената на централната власт заедно со локалната, државата заеднички ќе ја внесеме во ЕУ каде и припаѓаме. На чекор од заедничката и нова иднина!“, порача Мицкоски.
