Крис Роланд е австралиски фотограф од Сиднеј. Воглавно фотографира простори без луѓе, ама во најновата фото-серија тој се најде на крстосување на кинески брод. Во неговиот наутички фото-дневник, тој доловува како е да се биде единствениот што не зборува Кинески помеѓу 4000 Кинези, сместени на 18 палуби и во 2000 соби. Со други зборови, тоа е цел еден мини-свет.
Крстосувањата стануват сé попопуларни во Кина, и тоа како фамилијарен одмор. Помладите (!) се тие што им плаќаат на родителите и бабите и дедовците да дојдат со нив на крстарењето, а не обратно. Како резултат, на бродот има луѓе од сите возрасти и сите семејни групи.
(По)младите се занимаваат на симулаторот за сурфање, на импровизираните карпи за качување и на патеките за џогирање.
Постарите поминуваат повеќе време на релаксирање покрај базените и бањите и уживање во глетката.
Музичките театри, пак, се популарни и кај едните и кај другите, а со нив и живите свирки, караоке забавите, диското и казиното.
Популарноста на крстосувањата во Кина расте и веројатно така ќе продолжи. Тоа веројатно се должи на општествената трансформација што се случи во последните неколку декади. Богатството на средната класа порасна, и со тоа Кинезите сега имаат прилика да уживаат во повеќе одмори по теркот на западот, како што се крстосувањата.
Многу од постарите, пак, веројатно никогаш не патувале преку морето, па сакаат лесно и ол-инклузив искуство, а баш тоа го нуди крстарењето. Од друга страна, крстосувањето стана и статусен симбол за многу од Кинезите, особено оние од внатрешноста.
