Киев, 5 март 2022 (МИА) – Украинските сили ги држат клучните градови во централниот и југоисточниот дел на земјата, додека Русите се обидуваат да ги блокираат и задржат опколените Харков, Николаев, Чернихив и Суми, соопшти денеска украинскиот претседател Володимир Зеленски.
„На окупаторот му нанесуваме загуби какви што тој не можеше да замисли ниту во своите најлоши кошмари“, рече Зеленски.
Тој изјави дека за 10 дена војна загинале 10.000 руски војници, додавајќи дека тоа не може да се потврди бидејќи руската армија редовно не објавува информации за своите жртви, а само еднаш, во средата, открила дека бројот на загинати е 500.
Зеленски рече дека се работи за момчиња на возраст од 18 до 20 години на кои не им било ни објаснето за што се борат.
Украинскиот претседател претходно денеска објави дека украинските сили започнале контранапад на Харков, вториот по големина град во Украина со 1.4 милиони жители, кој е сцена на најинтензивните бомбардирања од почетокот на војната.
Руската армија, која продолжува да ја гранатира областа околу Киев, особено на северозапад и исток, во петокот ја освои нуклеарната централа Запорожје.
