Полскиот премиер Доналд Туск го обвини претседателот Карол Навроцки за продолжување на хаосот во Уставниот суд и порача дека можно решение постои и без промена на Уставот. Спорот меѓу двата политички блока околу составот на судот повторно се заострува, а за утре е закажана седница на уставните судии.
Туск на платформата Икс напиша дека претседателот може да ги признае судиите кои се законски избрани, бидејќи тоа е предвидено со Уставот, и оцени дека така би можеле да почнат со работа. Тој во исто време наведе дека Навроцки досега избрал пат на конфронтација со употреба на сила.
Долготрајниот спор за пополнувањето на Уставниот суд ескалираше во петокот, кога на веб-страницата на судот беше објавено дека актуелниот претседател Богдан Швенчковски и неговиот заменик се привремено разрешени од функциите. Во истото соопштение беше наведено дека судијката Ана Корвин-Пјотровска привремено ќе раководи со судот.
Според Туск, конзервативната партија „Право и правда“ (ПиС), која управуваше со Полска од 2015 до 2023 година, го пополнила Уставниот суд со судии политички блиски до неа. По промената на владата во 2023 година, левоцентристичката коалиција на Туск се обидува да ги пополни испразнетите места.
Корвин-Пјотровска е меѓу петтемина нови уставни судии предложени од парламентот, но тие сè уште не можат да ја преземат функцијата бидејќи Навроцки одбил да ги назначи. Тие положиле заклетва пред парламентот, а потоа Швенчковски не им дозволил пристап до зградата на Уставниот суд.
За попладне е закажана општа седница на сите уставни судии, на која телото може да даде согласност за покренување кривична постапка против уставни судии, како и да одлучи дали некој судија треба да биде пензиониран поради трајна неспособност за извршување на должностите.
