САД одобрија потенцијална продажба на оружје за Тајван во вредност од 619 милиони долари, а во оваа сума се вклучени и ракети за борбени авиони Ф-16, во моменти кога Тајван секојдневно јавува за упад на кинеските воздухопловни сили во неговиот простор за воздушна одбрана.
Продажбата на оружје веројатно дополнително ќе ги влоши и онака заладените врски меѓу Вашингтон и Пекинг. Официјален Пекинг постојано инсистира на прекин на ваквите оружени договори, сметајќи ги за неоправдана поддршка за Тајван – островска држава со демократски избрана влада за која Кина тврди дека е нејзина територија, според британските медиуми.
Пентагон вчера соопшти дека американскиот Стејт департмент одобрил потенцијална продажба на оружје и опрема на Тајван, која вклучува двесте напредни противвоздушни проектили воздух-воздух со среден дострел (AMRAAM) и сто ракети АГМ-88Б HARM.
„Предложената продажба ќе придонесе за способноста на примателот да обезбеди одбрана на својот воздушен простор, регионална безбедност и интероперабилност со САД“, се наведува во соопштението.
Тајванското Министерство за одбрана соопшти дека ракетите ќе помогнат во „ефикасната одбрана на воздушниот простор“ и „справување со заканите и провокациите на комунистичката армија“, како и дека ќе придонесат во зајакнување на одбранбените резерви.
Тајван и денеска, втор ден пријавува за голем упад на кинеското воздухопловство во зоната за идентификација на противвоздушната одбрана, при што само во изминатите 24 часа се регистрирани упади на 21 кинески авион.
Кина, пак, инсистира дека нејзините активности во областа се оправдани и дека се во насока на одбрана на својот територијален интегритет, но и предупредување кон САД за „заговорот со Тајван“.
Извор: МИА
