Преродената компанија Detroit Electric организираше специјална презентација во седиштето, во Детроит, на која го покажа својот модел SP: 01. Според податоците на производителот, тоа е најбрзиот електромобил во светот, до стотка забрзува за 3.7 секунди, а максималната брзина му е 249 km/h.
Според изданието Car and Driver возилото е надградено на платформата од Lotus Exige. И покрај сличностите помеѓу англискиот и американскиот модели, производителот не го потврди тоа, туку соопшти само дека новиот модел е врз алуминиумска шасија, а целата каросерија на SP: 01 е од карбон. Благодарение на тоа електромобилот тежи едвај 1.070 килограми.
Електромоторот е сместен меѓу двете оски, а неговата моќноста изнесува 204 КЅ со максимален вртежен момент од 225 Nm. Тој се напојува од литиум-полимерни батерии со капацитет од 37 kW / h. Батериите се полнат од мрежа за 10 часа. Ако се користи уредот 360 Powerback што е сопствен развој на Detroit Electric за полнење се потребни 4 часа. Автономијата на возилото е 306 километри. Во стандардна опрема SP: 01 има 4-брзински мануелен менувач, а со доплата може да се нарача автоматски со две нивоа. Стандардни се уште системот ESP, како и составот за обновување на кинетичка енергија при сопирање.
Електричното купе ќе се произведе во серија од 999 примероци, а почетната цена му е 135.000 долари. Моделот ќе биде прикажан на салонот во Шангај , а ќе се продава од август. До крајот на 2014 година компанијата Detroit Electric предвидува лансирање на уште два спортски модел на електрична енергија.
Текстот е објавен во соработка со АвтоПлус.
