По неколку месеци на гласини и шпекулации, во кои најчесто беше споменувано името Maxthon, Renault конечно ја претставува новината на салонот во Пекинг. Нема веќе тајни Французите сепак му даваат втора шанса на добриот стар Koleos.
Новото издание на SUV моделот е изградено на модуларната платформа на Алијансата- CMF-C / D, на која лежи во основа и X-Trail. Меѓуоскиното растојание на новиот Кoleos изнесува 2.710 mm, што е за пет милиметри подолго од јапонскиот оригинал. Должината исто така е во корист на Французинот – 4.670 во однос на 4.630 mm, a широчината на двата теренеци е еднаква – 1.840 mm. Koleos II има и поголем багажник од X-Trail и тоа за 105 литри. Волуменот со спуштени задни седишта достигнува 1.690 литри. Кросовер на Renault има и поголем клиренс – 213 mm, за три милиметри повеќе од Nissan.
Новата генерација на Renault Koleos ветува максимален комфор и безбедност, а во опремата ќе бидат вклучени загреан управувач, посебен систем за филтрација на воздухот, систем за лесно одмрзнување, интелигентен систем за погон на четири тркала 4×4-i, вграден инфо-комуникациски и мултимедијален систем R-Link 2, систем за автоматско активирање на системот за сопирање во случај на опасност и друго.
