Кинеската компанија Zeekr постави нов стандард во индустријата за електрични возила откако ја претстави својата надградена 5,5C EV батерија која овозможува најбрзо полнење во светот.
Компанијата соопшти дека благодарение на оваа иновација, возилата можат да се полнат од 10 до 80 проценти за само 10,5 минути, што претставува значителен чекор кон намалување на времето потребно за полнење на батериите на ЕВ.
Нивните нови литиум-железо-фосфатни батерии (LFP) се дизајнирани да одржуваат стабилни перформанси дури и во екстремни услови, така што корисниците ќе можат да го полнат своето возило од 10 до 80 проценти за само 30 минути дури и на температура од -10 степени Целзиусови.
Компанијата вели дека оптимизираните материјали и подобрената технологија му овозможиле на нивниот тим за истражување и развој да го постигне ова значително подобрување. Кога се поврзани со ултра-брзи полначи Zeekr V3, овие батерии ги надминуваат постоечките батерии од никел-кобалт-манган.
Новите батерии LFP прво ќе бидат интегрирани во седанот Zeekr 007, кој ќе започне со испорака следната недела.
Zeekr ја проширува својата мрежа на полначи
Zeekr веќе отвори над 500 станици за ултра брзо полнење во Кина, опремени со повеќе од 2.700 полначи кои се компатибилни со полнење од 800V. Компанијата планира да ја прошири мрежата на 1.000 станици до 2024 година, со цел да обезбеди над 10.000 ултра-брзи полначи до 2026 година.
Компанијата најави и почеток на испорака на својот урбан систем за помош при возење NZP (Zeekr Pilot), кој ќе овозможи интелигентна навигација и помош при возење на градските патишта. Првите испораки на овој систем започнуваат на крајот на август, носејќи им на корисниците напредни функции и подобрено возачко искуство.
Компанијата Zeekr е основана во 2021 година како дел од групацијата Geely и е специјализирана за производство на луксузни електрични возила со фокус на иновативни технологии, перформанси и одржливост. Нивниот прв модел, Zeekr 001, ја воспостави компанијата како лидер во сегментот на луксузни EV, а новите батерии и технологии дополнително ја зајакнуваат нивната позиција на пазарот.
Фото: pexels
Извор: energetski portal
