Претстојниот период е предизвикувачки и граѓаните треба да одлучат во каква држава сакаат да живеат дали во понижена, ограбена и криминална или во земја каде ќе се гради иднината на идните поколенија – порача претседателот на ВМРО ДПМНЕ Христијан Мицкоски денеска од Маврово – Ростуше. Тој истакна дека 15 јули е шанса граѓаните да си ја вратат државата на правите патеки, а преку глас за ВМРО- ДПМНЕ и коалицијата „За Обнова на Македонија“, како и да се направат проекти за секој граѓанин од програмата „Обнова“.
„Пред нас е исклучително предизвикувачки период. Најпрвин имаме околу 10 дена кампања што ни преостанаа и 2 дена молк до денот кога ќе треба да излеземе и да одлучиме во каква Македонија сакаме да живееме. Дали оваа Македонија која што е понижена, омаловажена, опљачкана каде што граѓаните се чувствуваат во сопствената држава граѓани од втор ред, каде што срамот, декаденцијата и поразите се секојдневие или Македонија која што ќе биде татковина за сите без разлика нивната етничка, без разлика на нивната политичка припадност, верска определба или политичка неопределба. 15 јули е денот кога треба да ја избереме иднината за нашите деца за поколенијата кои што ќе дојдат по нас но истовремено ќе треба и да го обелиме образот на нашите предци кои што животите ги дале за ова денеска што ние го живееме“, рече Мицкоски.
Додаде дека политичарите за да бидат пример треба да почнат од себе и да го почитуваат Уставот и законите. Исто така посочи и дека мора да има силен правен систем кој ќе проверува потекло на имот на политичарите, а се понуди да почне од него, па потоа да ги опфати сите политичари, вклучително и Зоран Заев.
„Мора да се истражи како е возможно со политичка професија да се градат хациенди, станови и да се возат луксузни автомобили. Ќе провериме од прв до последен“, вети Мицкоски.
„За да биде подобра нашата држава овој пат политичарите треба да почнат самите од себе. И затоа јас велам правда, почитување на законите, почитување на уставот и тоа да биде безусловно. Затоа што без правна држава, без да бидат почитувани законите нема да има ниту добра економија, ниту добра здравствен систем, ниту добро земјоделие, ниту добро образование, нема ништо. Прв и основен столб денеска на една модерна современа држава е да има функционален правен систем. А за да има функционален правен систем треба да почнеме од почеток. А ја велам, еве почнете од мене, јас првиот ќе бидам доброволец кој што ќе се пријави во новата влада во соодветна агенција да го провери неговиот имот и имотот на неговото семејство. На моето семејство, да провериме дали соодветствува со моите приходи, дали можеби нешто сум подскрил. Дали имало нешто алашвериш. Ако има, подготвен сум да одговарам. Ама втор ќе биде Зоран Заев, па и неговото семејство ќе го провериме. Ќе ги провериме сите политичари да видиме кој безмилосно го крадел сопствениот народ и кој се богател на маката на народот. Сите политичари да докажат од каде им е стекнат капиталот. Да видиме како е тоа возможно да се градат хациенди, станови, да се возат скапи возила, да се летува на јахти во монденски зимовалишта. Сѐ ќе провериме од првото до последното“, образложи лидерот на ВМРО-ДПМНЕ.
Заедно со своите експерти и во соработка со граѓаните и нивните идеи, ВМРО-ДПМНЕ има програма која нуди 1.000 проекти кои ветуваат 25% повисоки просечни плати, 20% поголеми пензии во еден мандат, 640 милиони субвенции за земјоделците, унапредено образование со најмалку еден универзитет во првите 1.000 на Шангајската листа, најнизок данок од 8%, 1.000 км нови патишта итн. Во обновата има политики и проекти буквално за секој граѓанин, уверува тој.
„Предвидовме минимум 25% повисоки просечни плати за еден мандат со јасна методологија и јасен алгоритам како, а не гола реторика и филозофија. Таму во програмата предвидовме до 20% поголеми пензии во еден мандат, предвидовме 640 милиони евра во еден мандат субвенции за земјоделците, таму предвидовме најмалку 1 универзитет во првите 1.000 според листата на Шангај, а сега немаме ни во првите 2.000. Предвидовме најнизок данок за работодавачите од 8% во Европа, предвидовме 0 данок за луѓето до 29 години. Најмалку 1.000 км нови реконструирани локани и регионални патни правци. Предвидовме во нашата преодна стратегија 18% ДДВ за угостителите до крај на 2021 да го намалиме на 10%. Предвидовме ослободување од онаа симболична помош за месеците април и мај и продолжување на истата до август. Има 1.000 проекти и политики буквално за секого“, рече Мицкоски.
Тој ги повика граѓаните на 15 јули да излезат во што поголем број и препорача да се почитуваат сите здравствени препораки пропишани за денот на гласањето и да го заокружат бројот 14 за држава спротивна од таа што ја нуди Заев, која, според него, е понижена, држава на лаги, криминал и корупција. Мицкоски вети Македонија горда, достоинствена и економски просперитетна.
„На 15 јули рано наутро од 7 часот да се заштитиме најпрво, а потоа рамо до рамо еден по еден да излеземе и да го заокружиме реден број 14 – бројот пред името на маестро Дурловски, бројот што ќе донесе историска најголема победа за коалицијата ‘За Обнова на Македонија’ која што ја предводи ВМРО-ДПМНЕ. Јас ве повикувам на 15 јули тоа да го сторите масовно. За онаа втората, а не онаа понижената, излажаната, омаловажената Македонија, туку онаа втората горда, достоинствена, чесна, честита каква што е Македонија – земја на домаќини, домаќинки чесни, верни луѓе. Не Македонија на неранимајковци, луѓе кои што не ја говорат вистината“, порача Мицкоски.
