Силна и Емотивна Порака до Македонските Иселеници
Премиерот Христијан Мицкоски испрати длабока порака до македонските иселеници кои се вратиле во својата татковина и започнале нови успешни приказни. Тој истакна дека нивното враќање не е само симболично, туку и клучно за напредокот на државата.
Обраќајќи им се на оние кои ја знаат Македонија „и одвнатре и однадвор“, Мицкоски нагласи дека заминувањето од татковината, всушност, било прашање на неопходност – барање по подобри услови, сигурност и перспектива. „Не можеме да се лутиме на оние кои заминале. Ги разбираме нивните предизвици, борби и тешки одлуки“, рече премиерот.
Тој истакна дека, без оглед на успехот постигнат во странство, човек секогаш се чувствува „дојденец“, додека дома е свој на свое. „Само во својата земја твоето име, труд и приказна имаат длабоко корен и трајна вредност“, додаде Мицкоски, потсетувајќи на народната мудрост дека „каменот тежи на своето место“.
Премиерот нагласи дека знаењето и искуството стекнати во странство, со враќањето во Македонија, добиваат нова димензија и стануваат основа за развој на нови бизниси, работни места и иновативни идеи, кои внесуваат свежа енергија во економијата. Според него, Македонија не е повеќе земја која стагнира, туку држава во трансформација, која се развива преку инвестиции во различни сектори.
„Нашата одговорност како Влада е да обезбедиме услови – стабилност, правна сигурност и поддршка за инвестиции. Но, државата се негува не само со институции, туку и со знаење, иновации и храброст“, изјави Мицкоски.
Во своето обраќање, тој испрати и силна порака до македонската дијаспора ширум светот: „Ве разбираме, ве почитуваме и нашите врати се отворени“. Нагласи дека не ветува лесен пат, но нуди можност за трудот да биде дел од нешто поголемо – придонес за заедницата и идните генерации.
„Домот не е совршен, туку се гради. Нашата заедничка Македонија денес е токму тоа – дом кој се гради и во кој има место за сите нас“, заклучи Мицкоски, нагласувајќи дека враќањето е сила и најсилна порака до сите дека татковината сè уште ги чека своите.
