Дизајнерката Лидија Берсани ја креираше првата луксузна јахта наменета само за жени. Бело-златниот луксузен брод е долг 80 метри и е прекриен со кристали, злато, крзно и цвеќе. Наречен е „Bela“, што во превод значи „убавица“.
„Јахтата е романтична и топла. Доминира белата, бојата на слонова коска и златната. Ентериерот е многу богат и удобен“ – вака на официјалната веб страна е опишана јахтата, која патем е наменета за само 12 гости, кои би биле сместени во шест луксузни кабини.
Главната кабина има кружен кревет со балдахин, приватна тераса, дебели завеси и скапоцен ќилим. На палубата има шанк, како и место за вечера и опрема за жива музика. Очекувано, јахтата располага и со хидромасажен базен, сауна, како и ледени фонтани. Во внатрешноста се сместени и фитнес клуб, џакузи, библиотека со камин, козметички салон, диско клуб, кино-сала и неколку барови.
Секоја од палубите има дел за опуштање и сончање, а меѓусебно се поврзани со скали и лифтови, како вертикални, така и хоризонтални. На врвот на јахтата има хелиодром и златен хеликоптер.
„Уште немаме конечна цена. Идејата беше да се изгради најлуксузната јахта на светот. Сигурно нема да биде ефтина“, вели Берсани.
Ете, сега не мора повеќе да размислувате што да и подарите за Св. Валентајн или 8-ми Март. 🙂
