Јапонската влада формира нова агенција за справување со природни катастрофи, во време кога проценува дека можен мегаземјотрес би можел да предизвика речиси 300.000 жртви. Институцијата треба да ја подобри подготовката, реакцијата и обнова по катастрофи, како и условите во центрите за евакуација.
Во новата агенција ќе работат повеќе од 350 луѓе, а нејзиниот фокус ќе биде на подготовка, реагирање во вонредни ситуации и обнова по природни катастрофи. Формирањето не е поврзано со непосредна најава за несреќа, туку со загриженоста дека земјата не е доволно подготвена за катастрофа од размерите на земјотресот и цунамито од 2011 година.
Министерот за обнова Гоши Хосоно во понеделникот ги повика локалните власти и граѓаните да ја проверат отпорноста на зградите и домовите, да го прицврстат мебелот и да ги разгледаат плановите за евакуација. Тој препорача и да се обезбедат резерви вода за најмалку три дена, како и преносни тоалети.
Според владините процени, најголема закана останува можен мегаземјотрес во подморскиот ров Нанкаи, кој би можел да усмрти околу 298.000 луѓе, да принуди на евакуација 6,5 милиони жители и да уништи 2,35 милиони домови. Паралелно, властите проценуваат дека земјотрес во подморските рова кај северниот брег би можел да однесе речиси 200.000 животи, а силен потрес во поширокото подрачје на Токио да предизвика околу 18.000 смртни случаи.
Новата агенција треба да се занимава и со подобрување на условите во центрите за евакуација, кои со години се критикувани поради недоволна опременост. Меѓу планираните мерки се обезбедување преносни тоалети, кујни за топли оброци, можности за капење со топла вода и кревети од картон.
Во текстот се наведува и дека помалку од половина од општинските службеници во Јапонија поминале обука за справување со катастрофи, а само 15 отсто од општините имаат планови за евакуација на постари лица и лица со попреченост на кои им е потребна помош.
