Властите на Хамас во Газа ја обвинија Агенцијата на Обединетите нации за палестински бегалци (УНРВА) за „заговор“ со Израел за „присилно раселување“ на населението од северниот дел на Појасот Газа во неговиот јужен дел.
Агенцијата „и нејзините функционери се одговорни за оваа хуманитарна катастрофа“, се вели во соопштението на Саламех Маруф, шеф на прес-службата на властите на Хамас. Тие „од првиот момент ги почитуваа диктатите на окупацијата, напуштајќи ги своите позиции и отстапувајќи ја својата одговорност пред стотици илјади жители“ на северот на Газа, рече Маруф.
Шефот на прес-службата го осуди очигледниот дослух меѓу агенцијата на ОН и „окупацијата (Израел) и нејзините планови за принудно раселување“.
Илјадници очајни Палестинци денеска пеш побегнаа од северниот дел на Појасот Газа, додека Израел ја стегна контролата врз градот Газа за да ги уништи милитантите на Хамас, без надеж за одмор за заробеното население. Цивилите се упатија кон југ без багаж или само неколку ситни предмети за да избегаат од бомбардирањето и борбите меѓу израелската армија и Хамас што беснеат во и околу урнатините на градот Газа.
Според портпаролот на израелската армија, „илјадници жители на северниот дел на Појасот Газа одговориле на повиците на израелската армија и сега се упатуваат кон југ“.
МИА
