Според руската безбедносна служба, тинејџерот објавил фотографии на Тикток на кои носи тактичка облека и фантомка, а во рацете држи предмет што личи на автоматско оружје. Објавил и фотографии направени во музејот-парк Царицино, со натпис „Најдов место“.
При претресот на неговиот дом биле пронајдени облеката и предметите што се гледаат на фотографиите. Според ФСБ, на неговиот телефон било утврдено дека следел неонацистички канал на Телеграм и дека пребарувал информации за терористички напади, масовни убиства и други насилни дејства.
„Благодарни сме ѝ на американската страна за доставените информации“, соопшти ФСБ.
Американската амбасада во Москва во саботата предупреди на веродостојна закана од напад со голем број жртви во комплексот Царицино и ги повика американските државјани да ја избегнуваат областа.
По предупредувањето, планираните настани во комплексот беа откажани, а безбедносните мерки беа засилени. Паркот привремено беше затворен.
Рускиот Истражен комитет сега одлучува какви правни мерки ќе бидат преземени против малолетникот.
Извор: МКД.мк
