„Доволни беа само неколку дена, помалку од една недела учество на ДПМНЕ во техничката Влада и на виделина излегоа сите нивни лаги заедно со нивната неспособност. Министерот за внатрешни работи од ДПМНЕ јавно изјави дека не успеал да ја убеди амбасадорката на соседна Грција. Затоа нема што да прави, не може да го реши проблемот со пасошите“, обвини денеска на прес-конференција Дарко Каевски, пратеник на СДСМ.
„Замислете, многу ‘силната партија’ ДПМНЕ не може една амбасадорка да ја убеди, нешто да смени. Истите оние кои јавно велеа дека можат меѓународен договор да променат, дека може да го променат и францускиот предлог. Ако една амбасадорка не можат да убедат од ДПМНЕ, како ќе убедат 27 земји членки на ЕУ да се смени преговарачка рамка? Секако никако. Не само поради тоа што го имаме најдобриот договор што можеше да го добиеме. Туку затоа што преговарачката рамка е одобрена и прифатена од 27 земји членки на ЕУ. Цела Европа, сите претставници на меѓународна заедница веќе неколкупати ги посочи овие факти“, рече Каевски.
Според него, се потврдило тоа што СДСМ го тврделе – дека ВМРО-ДПМНЕ едно зборува пред да влезе во Влада, а друго кога е во Влада, и дека не може да направи ништо, само ги лаже граѓаните.
