Претседателот на Демократската унија за интеграција – Али Ахмети, остварил средба со министерката за надворешни работи на Бугарија – Теодора Генчовска, информираат од партијата.
Ахмети и Генчовска разговарале за спорот меѓу двете земји, како и за решение кое ќе доведе до зелено светло за почеток на преговорите и одржување на првата меѓувладина конференција на земјава со ЕУ.
Како што се вели во соопштението, Ахмети на средбата изјавил дека секое одложување на решавањето на спорот меѓу Скопје и Софија оди на штета на бугарската заедница во земјава. Тој ги поканил бугарските власти да ја зголемат меѓусебната доверба и да работат заедно за позитивен епилог на билатералниот спор преку стеснување на просторот за дејствување на агенди во земјата и регионот кои не се совпаѓаат со западните определби на државава.
Итното затворање на овој спор ќе биде од корист за бугарската заедница во земјава, регионот и Европа, но секако, притоа „без да се загрози националниот и јазичниот идентитет на нашите сограѓани“, потенцирал Ахмети.
Од ДУИ посочуваат дека решавањето на спорот меѓу двете земји придонесува за мир, безбедност и стабилност во целиот регион, и дека граѓаните веќе очекуваат позитивни резултати за изнаоѓање заеднички јазик во решавањето на спорот бидејќи Европа не е во целосен мир без Западен Балкан.
Ахмети и Генчовска на средбата истакнале и дека е неопходно да се интензивираат трговската и културната размена со цел подобрување на благосостојбата на граѓаните и подоброто меѓусебно познавање, додаваат од ДУИ.
