Компанијата Bugatti ќе лансира шест посебни модификации на хиперавтомобилот Veyron Grand Sport Vitesse, од кои секоја ќе биде посветена на одредена личност, која одигра важна улога во 104-годишната историја на марката.
Производителот планира да покажува по една верзија на секои два месеци.
Првата варијанта е создадена во чест на францускиот автомобилски тркач Жан-Пјер Вимил, кој зад воланот на Bugatti освоил две победи на 24 часа Ле Ман. Прв пат пилотот триумфираше во 1937 година со моделот 57G Tank, а негов совозач беше Роберт Беноа. Втората титула била освоена во 1939 година со Bugatti 57C Tank, кога му „помагал“ Пјер Вејрон, по кого е наречена современата изведба на брендот. Вимил загинал во сообраќајна несреќа во 1949 година. Специјалната модификација на Veyron е направена во стилот на возилото, кое било најдобро на 24 часа Ле Ман во 1937 година. Креацијата е обоена во истите бои, а на нејзиниот заден спојлер е насликана шемата на патеката на која се одржува легендарната трка.
Технички ѕверката не е променета. Таа се потпира на 8,0-литарски W16 мотор со четири турбини и моќ од 1200 КЅ и 1500 Nm вртежен момент. До стотка машината забрзува за 2,6 секунди.
Специјалната верзија Bugatti Veyron Grand Sport Vitesse посветена на Жан-Пјер Вимил ќе биде со серија од три возила, а цената засега е дел од мистеријата.
Текстот е објавен во соработка на АвтоПлус
