Белата куќа не сака промена во односите меѓу САД и Кина, вклучително и односите за прашањето за Тајван, изјави денеска портпаролот на Белата куќа за национална безбедност – Џон Кирби.
Со овој став тој му одговори на шефот на кинеската дипломатија, Чин Ганг, кој денеска го предупреди Вашингтон дека треба да го промени својот „искривен“ став и да не ризикува конфликт, пренесоа британските медиуми.
„Сакаме стратешка конкуренција со Кина. Ние не бараме конфликт. Нашата цел е да се натпреваруваме, да победиме и апсолутно сакаме да ги задржиме односите на тоа ниво“, изјави Кирби.
Претходно денеска, Чин изјави дека политиката на Вашингтон кон Кина „целосно отстапува од рационалниот и здрав пат“, пренесоа американските медиуми.
„Доколку САД не притиснат на сопирачките, туку продолжат да одат по погрешниот пат, ниту една заштитна бариера не може да спречи излетување од шините, а секако ќе има конфликт и конфронтација“, се закани кинескиот министер.
Чин изјави дека „таквото ривалство е непромислено коцкање, при што влогот се основните интереси на двете нации, па дури и иднината на човештвото“.
МИА
