ВМРО-ДПМНЕ најостро ги демантира, како што велат, лагите кои Красимир Каракачанов ги објавува на својот Фејсбук профил.
„Ниту еден од посочените функционери на ВМРО-ДПМНЕ нема бугарски пасош, што само покажува дека неговата денешна објава е класична лажна вест“, велат од ВМРО-ДПМНЕ.
Според нив, очигледно е дека Каракачанов, воден од својата антимакедонска политика, има за цел да оцрнува и да фабрикува невистини против функционери на ВМРО-ДПМНЕ и против партијата, бидејќи, како што велат, ВМРО-ДПМНЕ е политичка партија во Македонија која остро се спротивставува на неговите негации на македонскиот јазик, македонскиот народ, македонскиот идентитет и македонската историја.
„Гледаме дека Владата постојано молчи на неговите провокации, како во случајот со објавата на картата на Санстефанска Бугарија и редица други навреди и изблици на империјализам својствен за 19 век. ВМРО-ДПМНЕ е единстевиот политички фактор кој се спротивставува на ваквата негаторска политика на Каракачанов и оттука е јасна причината поради која тој мора да се служи со лаги. Ако Владата молчи, ВМРО-ДПМНЕ не молчи и тоа многу го боли Каракачанов“, се вели во реакцијата.
Од ВМРО-ДПМНЕ потенцираат и дека е мошне симптоматично што ваквата објава доаѓа токму во време кога владата на Заев, кој самиот има изјавено дека го смета Каракачанов за пријател, се дави, според нив, во огромни скандали.
„Ова покажува дека Зоран Заев, освен што е во коалиција со мафијата во Македонија, е во блиска коалиција и со сите негаторски и антимакедонски сили. Секогаш кога Заев е загрозен од некој скандал, како што е обидот за коруптивна набавка на вакцини, неспособност да се справи со здравствената и економската криза, падот на рејтингот на СДСМ или кога излегува некоја афера како што е набавката на софтвер од страна на Драги Рашковски, се појавува некој лик како Красимир Каракачанов да му фрли гума за спасување“, посочуваат од најголемата опозициска партија.
Тие воедно и им порачаа на Каракачанов и на Заев дека „оваа фрлена гума од сам старт е издишана и нема да помине во јавноста“.
„Лагите кои денес Каракачанов ги лиферуваше на својот Фејсбук профил нема да му помогнат на неговиот пријател Зоран Заев. Заев и неговата влада не ги спасува ништо од сѐ поизвесниот крај, ниту спиновите, ниту лагите на Каракачанов“, децидни се ВМРО-ДПМНЕ.
