Скратеното име на државата „Северна Македонија“ (наместо „Република Северна Македонија“) не значи територијални претензии кон Бугарија или кон било која друга соседна земја, а Владата е подготвена на Бугарија тоа да ѝ го гарантира со нота, меморандум, изјава, декларација, протокол и слично, истакна денеска премиерот Зоран Заев во поглед на тврдењата од бугарска страна дека е загрижена поради можни идни претензии од страна на државава, доколку ѝ се дозволи без гаранции да влезе во ЕУ.
Сличен одговор Заев има и на обвинувањата за претензии за македонско малцинство од другата страна на границата – ниту оваа, ниту некоја друга влада претходно, не се мешала во внатрешните работи на Бугарија, вели премиерот. Тој повтори дека прашањето за малцинството и немешањето во внатрешните работи се регулирани со членот 11 од Договорот за добрососедство од 2017 година.
Иронијата, од друга страна, е што бугарскиот државен врв, барем пред бугарската јавност, тврди дека постапката во Европскиот парламент за македонско малцинство е поттикнат од официјално Скопје и тоа го посочува како едно од прекршувањата на Договорот за добрососедство.
Иронија е и тоа што во истиот тој член 11 од Договорот, во точка 3, веќе пишува дека „Двете Договорни страни немаат и нема да пројавуваат територијални претензии една спрема друга“.
Најголемата иронија, сепак, е што воопшто се зборува за некакви територијални претензии кога Бугарија, која како наш сосед и сојузник во НАТО, впрочем е земјата што покрај Грција, ќе го чува нашето небо. Токму ова го истакна и премиерот Заев, посочувајќи дека со прифаќањето на понудата од Бугарија, за сметка на понудите од Турција и Италија, државава покажала дека нема територијални претензии.
