„Улогата на полицијата во спроведување на одлуките и мерките на владината стратегија за запирање на ширењето на вирусот, е огромна и од исклучителна важност.
Посебно охрабрува дека навистина сме ги донеле правилните одлуки, за што деновиве говорат и бројките на намалени случаи на заболени“, порача премиерот Оливер Спасовски денеска во видео обраќање во чест на 7 мај – Денот на полицијата и безбедноста.
„Особено сум горд што ова е успех и на воспоставените норми и концепт за Јавниот мир и безбедноста, како гаранција за заштита на човековите права и слободи.
Овој успех е резултат и на воспоставената силна институционална свест и структура како брана против сите тенденции на корумпирање на безбедноста и против ставање на полицијата во функција на злоупотребата и незаконито работење, како што беше до пред три години.
Во таа насока, еден сериозен и значаен дел од енергијата и мерките од реформите беа посветени примарно на генералното подобрување на материјално техничките услови за работа токму на оние од кои што зависи спроведувањето на правото и законите – а тоа е полицијата.
Во нивното реализирање се водевме од фактите дека интегритетот, опременоста и статусот на полицискиот службеник се императив без кој што е невозможно спроведување на каква било системска реформа во тој домен“, вели Спасовски.
Најдобар доказ за успесите и постигнувањата, истакнува тој, се домашните и меѓународните анализи и истражувања кои потврдуваат дека Република Северна Македонија воспоставува професионална и стручна полициска служба која што е определена да биде реален и доверлив сервис на граѓаните.
„Затоа со право веруваме дека во наредниот период, ќе продолжиме да ги јакнеме севкупните капацитети на Министерството за внатрешни работи, за уште подобри резултати во работењето на сите организациони единици.
Нека ни е честит 7 мај – Денот на македонската полиција“, порача Спасовски.
И министерот за внатрешни работи – Наќе Чулев, чие обраќање се очекува во 11.30 часот, „прелиминарно“ го честиташе Денот на полицијата. На својот и на официјалните профили на МВР на социјалните мрежи, тој денеска објави фотографија од „фамозниот“ спот кој предизвика полемики во јавноста, а кој, според Чулев, беше снимен за да им се искаже благодарност и да се мотивираат припадниците на МВР.
