Заборавете на сите „умни“ методи за да ги спречите слушалките да се заплеткаат. На пат се новите безжични слушалки со вграден mp3 плеер – „Split“. Сеуште во фаза на прототип, тие се дизајнирани со мемориски капацитет од 256 мегабајти, а ги контролирате со едноставен загриз со вилицата. Да, баш така.
Двете магнетни слушалки се уклучуваат веднаш штом ги раздвоите. Тие се всушност два mp3 плеера што ја свират вашата музика во исто време, а се синхронизирани преку радио бранови. Гризнете еднаш, и вградениот акцелерометар и дава наредба на направата да прејде на наредната песна. Гризнете 2 пати по ред за да ја контролирате јачината на звукот. Ако џвакате мастика или планирате да јадете, само допрете ја десната слушалка и ќе го заклучите плеерот.
Малиот капацитет од 24 песни не е многу од помош при долгите патувања, но е перфектен при џогирање и вежбање. Плеерот се плни со USB кабел, но креаторите работат на тоа да овозможат полнење и снимање на песни во исто време.
„Сплит“ веројатно ќе чинат 155 долари по пар, а за неколку екстра долари ќе можете да си изберете и боја. Нема гаранции кога всушност прозиводот ќе прејде од фазата на изработка во готов производ наменет за потрошувачка, но можете да помогнете тоа да се случи побрзо со донирање на Kickstarter.com.