Израелскиот министер за надворешни работи Јаир Лапид денеска го критикуваше рускиот министер за надворешни работи Сергеј Лавров дека го споредил украинскиот претседател Володимир Зеленски со Адолф Хитлер, нарекувајќи ја изјавата „непростлива, срамна и историска грешка“.
Лапид рече дека очекува извинување и најави дека ќе го покани рускиот амбасадор во Тел Авив да го изрази својот протест, пренесоа израелските медиуми.
„Да се каже дека Хитлер бил Евреин е исто како да се каже дека Евреите сами се убивале. Нацистите ги прогонувале Евреите, само нацистите биле нацисти и само нацистите го иницирале систематското уништување на еврејскиот народ“, рече Лапид.
Дани Дајан – претседател на Меморијалниот центар на холокаустот во Јад Вашем во Ерусалим, исто така ги критикуваше изјавите на Лавров, нарекувајќи ги „опасни“ и „за осуда“. Тој додаде дека Лавров „ги претворил жртвите во криминалци, врз основа на целосно лажно тврдење дека Хитлер бил Евреин“.
Тој исто така рече дека е против тоа Украинците да се нарекуваат нацисти бидејќи „тоа го искривува терминот и им штети на жртвите на нацизмот“.
Контроверзните коментари Лавров ги изнессе во интервју за италијанската ТВ „Rete 4“, на прашање како може Русија да тврди дека ја „денацифицира“ Украина, кога и самиот украински претседател Володимир Зеленски е Евреин.
„Па што ако Зеленски е Евреин. Тоа не го негира фактот дека има нацистички елементи во Украина. Верувам дека и Хитлер исто така имал еврејско потекло“, рече Лавров.
„Веќе долго време слушаме како мудриот еврејски народ и самиот вели дека најголемите антисемити и самите биле Евреи“, додаде Лавров.
Израел, инаку, постојано изразува отворена поддршка за Украина, но сепак е внимателен да не ги наруши односите со Русија поради интересите во соседна Сирија. Сепак, минатиот месец ја обвини Русија за воени злосторства во Украина и се сложи да испорача шлемови и панцири за украинските сили.
