Москва, 27 февруари 2022 (МИА) – Рускиот претседател Владимир Путин денеска нареди руските нуклеарни сили да се подигнат на високо ниво на подготвеност, оправдувајќи го тоа „со агресивните изјави на НАТО“ и економските санкции против Москва.
„Им наредувам на министерот за одбрана и на началникот на Генералштабот да ги стават силите за одвраќање на руската армија во борбена готовност“, рече Путин на средбата со воените лидери, која беше пренесувана и на телевизија.
„Разбирам“, одговори министерот за одбрана Сергеј Шојгу.
Путин одлуката ја оправда со „агресивните изјави на лидерите на НАТО кон Русија“ и „незаконските економски санкции“ што и беа наметнати по инвазијата на Украина.
Putin: “Western countries aren’t only taking unfriendly economic actions against our country, but leaders of major Nato countries are making aggressive statements about our country. So I order to move Russia’s deterrence forces to a special regime of duty.” pic.twitter.com/AC1yHncqZc
— max seddon (@maxseddon) February 27, 2022
„Силите за одвраќање на војниците се очекува да го обесхрабрат нападот врз Русија, вклучително и војна што би подразбирала употреба на нуклеарно оружје“, соопшти Министерството за одбрана.
Тие се опремени со проектили, стратешки бомбардери, подморници и бродови со нуклеарно оружје.
По инвазијата на Украина, Путин предупреди дека оние кои се обидуваат да ја спречат Русија „ќе се соочат со последици што никогаш не ги виделе во својата историја“. Многумина ова го протолкуваа како закана од нуклеарно оружје.
