Од моментот кога започна огнената стихија што ја зафати државата, па до денеска, имало вкупно 106 поголеми шумски пожари, од кои најлошиот бил сега изгаснатиот пожар што ги зафати општините Берово, Пехчево и делумно Делчево, информираше директорот на ЦУК – Стојанче Ангелов, на денешната прес-конференција.
Тој соопшти дека во пожарите се изгорени десетина објекти – пред сѐ стари куќи и придружни објекти како штали, плевни и слично, а изгорен е и покрив на куќа во Кочани.
„Од страна на општините се формирани комисии кои детално ќе ја утврдат штетата и граѓаните ќе бидат праведно обештетени. Воедно и Владата е овде ако има некаде поголема штета да ја надомести. Но, во овој момент слободно можеме да констатираме дека штетите во населените места, во селата и градовите, се навистина мали имајќи го во предвид обемот на пожарите кои ја зафатија државата“, рече Ангелов.
Според него, свесноста на граѓаните е на многу повисоко ниво, односно тие значително повеќе внимаваат и не се појавуваат често како ненамерен фактор за појава на пожари.
„Со овие активности беше подигната и целосна забрана за движење во шуми, мерка која помогна за намалување на бројот на пожарите и која овие денови ја разгледуваме и доколку е стабилна состобата ќе побараме од страна на Национални шуми да биде тргната или намалена, односно движењето низ шуми да биде само со дозвола“, информира Ангелов.
Ангелов се заблагодари на МВР и на сите пожарникари, за кои рече дека покажале огромна пожртвуваност, кои помагале и во своите, но и во соседните општини. Благодарност упати и до ДЗС, вработените во ЦУК кои помогнале во координацијата, на Национални шуми и на сите останати институции, но и на странските екипи (српските хеликоптери, романскиот авион, црногорскиот хеликоптер, но и австриските, француските, словенечките и бугарските пожарникари кои заминаа). Се заблагодари и на францсуките инструктори, експерти за шумски пожари кои рано утрово заминале за Франција.
Во моментов, како што посочи, активна поддршка на Главниот штаб за управување со кризи даваат инструктори од САД.
„Овие пожари ни ги покажаа слабостите за кои бевме свесни, но овој пат постои црвста намера при ЦУК и ДЗС, да дадеме сѐ од себе да направиме брзи, длабоки реформи со кои ќе ги отрстраниме сите согледани недостатоци. Активно подготвуваме план за реформи. Ќе формираме широко тело кое ќе се зафати со овие коренити реформи и верувам во следните месеци ќе успееме да ги поставиме основите на новиот систем за управување со кризи, единствен систем кој ќе ги опфати сите чинители кои се расфрлани во неколку институции“, рече Ангелов.
Лажна вест е, додаде, дека од австриските пожарникари е украдена пила.
„Тогаш напишав саркастичен твит кој гласеше ‘Да бидам искрен и јас поверував на лажната вест за украдената моторна пила од австриските пожаникари, а и како да не поверувам кога токму тој ден околу австријците се моташе делегација на ВМРО-ДПМНЕ’. Ова е обичен твит кој за Твитер е нормален, каде преку исмевање укажувам на апсурдот дека е украдена моторна пила. Најмалку јас помислив дека член на делегација на ВМРО-ДПМНЕ украл моторна пила. Се работеше за шега, доколку некој се пронашол во овој твит јас се извинувам, немав лоша намера“, заклучи Ангелов.
Извор: МИА
