Извозот на сув цвет од канабис за медицински цели од Северна Македонија за пазарите во Европската Унија станува реалност, соопшти премиерот Зоран Заев на Фејсбук. Тој воедно и упати честитка до првата македонска компанија – НЈСК Холдинг, која вложува во, како што истакна, најсовремени стандарди за ваков вид фармацевтско производство и која доби лиценца за извоз на европските пазари.
Владата и надлежните институции, Министерството за здравство, како и Агенцијата за лекови и медицински средства, даваат поддршка со цел оваа индустриска гранка да се развива согласно светските текови и европските регулатива, вели премиерот.
„Имаме намера да основаме неколку фондови од дополнителните даноци што оваа индустрија ќе ги плаќа кон државата и со тоа кон граѓаните, како резултат на профитот од извозот на цветот од медицински канабис. Од нивните давачки кон државата ќе ги поддржиме лекувањата на лицата со ретки болести, ќе основаме медиумски фонд за продукција на домашни содржини, како и проекти од областа на културата, спортот и проекти на граѓанскиот сектор, но и работата на Агенцијата за канабис. Оваа можност ќе ја обезбедиме низ строга регулатива исклучиво согласно ЕУ стандарди и правила“, потенцира Заев.
Од економски аспект, според него, извозот на цвет од канабис за медицински цели ќе значи и нови инвестиции и развој, а ќе стимулира и отворање на нови високоплатени работни места.
„Да бидеме пред останатите во регионот, да ги следиме современите текови и економските преструктуирања, бидејќи одредени индустрии може и тоа како да ја поттикнат домашната економија и да помогнат.
Во таа смисла, ја поздравувам и поддржувам и работата на работната група за декриминализација на канабисот, координирана од Владата, и верувам дека низ инклузивен процес ќе се дефинираат најдобрите решенија за користење на медицинските и економските бенефити од билката канабис“, порачува Заев.
