Во Софија денеска беше презентирана таканаречената „Бела книга за јазичниот спор меѓу Република Северна Македонија и Бугарија“ со која Бугарија ќе ја објаснува својата позиција и историскиот и јазичниот спор со Македонија пред меѓународните пријатели, пред сѐ во ЕУ. Како што изјави пред само неколку дена бугарскиот историчар и член на мешовитата комисија – Кирил Топалов, кој е еден од рецензентите на книгата, со ова дело бугарските историчари ќе се обидат „да ги обезличат лагите кои со децении се наметнувани во земјава“. За потсетување, во истото тоа интервју, Топалов ја нарече Македонија „Северна Кореја на Балканот“.
Како што пренесува „Независен“, книгата е напишана од осум автори, по тројца од Македонија и Бугарија и по еден од Албанија и Србија. Во неа тие пишуваат за „систематското уништување или фалсификување на бугарското културно историско наследство и кршење на човековите права во минатото и денес“, но и за историскиот развој на бугарскиот јазик и појавата на современиот бугарски литературен јазик и улогата на бугарските преродбеници родени на територијата на денешна Македонија. Според авторите, во книгата се прикажани и современите фалсификати всадени меѓу помладите генерации преку актуелните учебници, а се даваат и примери на уништување на бугарските културно-историски споменици. Во книгата се пишува и за „масовните репресии“ при наметнувањето на овие фалсификати, при што се презентираат документи од Министерството за внатрешни работи во Скопје со кои, наводно, се потврдува прогонот на бугарскиот литературен јазик и ден денес, пренесува „Независен“. Целата вест прочитајте ја ТУКА.
